فطاير التوست المحشيه بالدجاج والخضار _ فطاير التوست
فطاير التوست
أو التوست المقلي
أكلة سهلة ولذيذة .. ومناسبة لرمضان مع الفطور أو ممكن تقدم مع الشاي كطبق موالح ..
أبدأ بسم الله الطبق
المقادير :
2 كيس عيش توست ( الكمية حسب رغبتك )
للتغميس أو تغطية التوست :
بيض تقريبا 4 حبات
بقسماط
دقيق ابيض
مقادير الحشوة :
صحن صدور دجاج بدون عظم : 3 – 4 صدور
2 بصل مقطع شرايح
2 جزر مبشور
فلفل رومي مقطع صغير : الكمية حسب رغبتك (ممكن ربع حبة وسط او نصف حبه حسب اللي يناسبك )
2 – 3 ملعقة كبيرة جبنة سايحة (جبنة كاسات المراعي او كرافت أو أي نوع )
ملح وبهارات : كمون وكزبرة ناشفة وفلفل اسود
الطريقة :
أولاً تجهيز الحشوة :
1/
نقطع الصدور لقطع صغيرة جدا ثم نغسلها ونصب عليها خل ونتركها بالثلاجة ربع ساعة
" السبب حتى يشيل الخل أو الليمون أي ريحة او زفرة في الدجاج
" وممكن كمان تعصري عليها حبة الى حبتين ليمون وهو الأفضل "
2/
بعد كده نجيب الطاوة ونضع عليها شوية زيت والدجاج بعد ما نكب الخل والماء اللي طلع منه
نحركه دقيقة على النار ,, بس يتغير لونه نقوم نضيف عليه البصل ونقلب ل3 – 4 دقايق حتى يذبل البصل
ثم نضيف الجزر ونقلب دقيقتين
ثم نضيف الفلفل الرومي
ونقلب دقيقتين أخرى
ثم نضيف البهار ونقلب الحشوة ونحرك باستمرار ..
بس تتسبك نطفي عليها ونضيف عليها الجبنة السايحة الكاسات ونقلبها حتى تتجانس
ونترك الحشوة على جنب حتى تبرد ويجي وقت استخدامها
ثانياً تجهيز العيش التوست :
1/
نقطع التوست إلى دوائر بواسطة صحن او زبدية مدورة او قطاعه مدورة
والزوايد ما نرميها " اتركوها على جنب وأقولكم بعد شوي ايش تعملوا فيها "
انا احتجت هنا لكيسين عيش توست
وعملت لي تقريباً 20 – 25 فطيرة توست
2/
زوايد وأطراف العيش التوست :
دخليها فرن حار مدة 20 دقيقة تقريبا ثم اطفي عليها وقلبيها واتركيها بالفرن الى ان تتحمر وتنشف
بعدها حطيها بالخلاط واطحنيها ناعم
ثم بواسطة صفاية سل كاو نخل انخليها حتى تتخلصي من الأجزاء الكبيرة وتحصلي على بودرة ناعمة
احفظيها في قارورة او علبه بلاستيك بالافريزر واستخدميها كبقسماط لتغطية الكفتة او حتى لطبقنا هذا ..
3/
بعد ما ننتهي من التقطيع نفرد العيش المدور بواسطة الشوبك او فرادة السمبوسة : نفرد خفيف بواسطة الضغط الخفيف عليه حتى ما يتقطع
لا تفرديه كثير عشان ما يتقطع عليك ويخرب
بعدين
الآن خلونا نشوف الصوره هذي :
أنا وضعت أرقام على الصورة حتى أوضح لكم ايش عملت :
رقم 1 شكل العيش التوست بعد التقطيع والفرد
رقم 2 قمنا بدهن أطراف التوست بواسطة ملعقة بخليط الدقيق والماء " يساعد على إلتصاق العيش ببعضه حتى ما ينفك اثناء القلي
رقم 3 وضعنا عليه ملعقة من الحشوة
رقم 4 قفلناه بقطعه ثانية من التوست
4/
بعد ما ننتهي من كل المقدار .. نجيب دقيق .. شابورة مطحونة او بقسماط .. بيض
نغمس حبات التوست بالدقيق ونغطيها بالكامل بواسطة الدقيق
ثم نغمسها بالبيض ثم بالبقسماط
وهذي صورة له
5/
نقلي الفطاير في زيت حار
"حتى تتحمر بسرعة وماتشرب زيت كثير "
6/
ثم نقدمها بعدما نقطعها نصفين
( وممكن تقدم بدون تقطيع )
وهذي صورة بعد ما صار طبقنا جاهز
ولاحظوا الحشوة كيف حلوة ^_^
أول وحده ترد تتفضل تاخذ الصحن معاها
"وبالعافيه على قلبها "
وهذا صحن لباقي بنات ال مدونة عشان ما يزعلوا
إن شااء الله يكون طبق خفيف ويعجبكم
فطاير التوست المحشيه بالدجاج والخضار _ فطاير التوست
فطاير التوست المحشيه بالدجاج والخضار _ فطاير التوست