الطبق الجانبي اللي هاعمله النهارده هو عبارة عن "فطيرة السبانخ" ودي هاعملها مخصوص علشان الناس اللي مش بتحب السبانخ علشان أخليهم يحبوها لأن الطبق ده طعمه حلو قوي ومليان فيتامينات الجسم محتاج لها..
المقادير: ـ
كيلو سبانخ مسلوقة ممكن تتسلق وممكن تكون جاهزة.
رقائق هشة من أي سوبر ماركت.
ملعقتين صنوبر.
جبنة رومي مبشورة.
5 فصوص ثوم مدقوق.
2/1 كوب كريمة.
2 بيض.
ملح وفلفل.
زبدة.
الطريقة:
هاجيب الصينية واحط فيها معلقة زبدة.. وبعد كده هاجيب العجينة وأفردها بنشابة وأحطها بحجم الصينية وأبططها.
هافرد العجينة في الصينية
هاجيب طاسة وهاحط ملعقة زبدة وأحطها على النار.
بعد ما الزبدة تسيح هاضيف إليها السبانخ وأقلبها كويس وبعد كده هاضيف إليها الملح والفلفل والبهارات والثوم مع التقليب المستمرّ.
هجيب طبق واسع واكسر 2 بيضة مضاف ليهم رشّة ملح وفلفل واضربهم بالمضرب واضيف ليهم نص كوب كريمة (واقلبهم بالراحة).. وبعد كده أضيف ليهم الجبنة المبشورة وشوية ملح وبهارات.
هاجيب السبانخ واضيفها للخليط السابق واقلبهم كلهم مع بعضهم كويس.
هاجيب الصينية اللي فيها الفطيرة وهاحط عليها السبانخ بالتساوي وفي النهاية أرش الصنوبر من على الوش وأدخلها الفرن لمدة نص ساعة.
ده الشكل النهائي لفطيرة السبانخ..وبالهنا والشفا